உலு லங்காட், ஜூலை 17: சிலாங்கூர் முழுவதிலும் உள்ள சங்கங்கள் மற்றும் அமைப்புகளுக்குப் பசுமைத் தொழில்நுட்பம் மற்றும் சுற்றுச்சூழல் சிறு மானியங்களுக்கான மொத்தம் RM1.3 மில்லியன் ஒதுக்கப்பட்டுள்ளது.
பசுமைத் தொழில்நுட்ப சிறு மானியத்திற்காக (GKTH) மொத்தம் RM800,000 மற்றும் சுற்றுச்சூழல் சிறு மானியத்திற்காக (GKAS) RM500,000 ஒதுக்கப்பட்டுள்ளதாக சுற்றுச்சூழல் மற்றும் பசுமைத் தொழில்நுட்பத் துறையின் பொறுப்பு உறுப்பினர் கூறினார்.
மானியம் பெறுபவர்களில் அரசு சாரா நிறுவனங்கள் (என்ஜிஓக்கள்), குடியிருப்போர் சங்கங்கள், கூட்டு மேலாண்மை அமைப்புகள் (ஜேஎம்பி), சுராவ், மசூதிகள் மற்றும் பள்ளிகள் ஆகியவை அடங்கும் என்று ஹீ லாய் சியான் கூறினார்.
“இந்த மானியம் எதிர்வரும் வெள்ளிக்கிழமை ஒப்படைக்கப்படும். மேலும் பசுமை தொழில்நுட்பம் மற்றும் சுற்றுச்சூழல் பாதுகாப்பு நடவடிக்கைகளில் சமூகம் தீவிரமாகச் செயல்பட ஊக்குவிப்பதே இந்த மானியத்தின் நோக்கமாகும்.
“மரங்கள் நடுதல், ஆறுகள் மற்றும் கடற்கரைகளைச் சுத்தம் செய்தல், மழைநீர் சேகரிப்பு அமைப்பை உருவாக்குதல், மறுசுழற்சி மற்றும் சோலார் விளக்குகளை நிறுவுதல் ஆகியவை இதில் அடங்கும்,” என்று அவர் இன்று சுங்கை சுவா சீனத் தேசிய வகை பள்ளியில் சோலார் விளக்குகளை நிறுவும் நிகழ்வு நிறைவடைந்த பிறகு கூறினார்.
ஏறக்குறைய 1,400 மாணவர்கள் மற்றும் ஆசிரியர்கள் பயன்பெறும் வகையில் எட்டு சோலார் விளக்கு கம்பங்களை நிறுவுவதற்கு சம்பந்தப்பட்ட பள்ளிக்கு RM20,000 தொகை ஒதுக்கப்பட்டது.
ஏப்ரல் 20 முதல் சிறிய மானியத்திற்கான விண்ணப்பங்கள் திறக்கப்பட்டன. சுற்றுச்சூழல் மற்றும் நகர்ப்புற மாசுபாட்டின் அபாயத்தைக் குறைப்பதுடன், மாநிலத்தில் நேர்மறையான தாக்கத்தை ஏற்படுத்தக்கூடிய திட்டங்களுக்கு முன்னுரிமை அளிக்கப்பட்டது.
இது பொருளாதார, சமூக மற்றும் சுற்றுச்சூழல் வளர்ச்சியில் நீண்டகாலத் தாக்கத்தை ஏற்படுத்தும் பசுமை மற்றும் புதுமை திட்டங்களுக்கு முன்னுரிமை அளிக்கிறது.
