ஷா ஆலம், மே 23: ஷா ஆலம் நகரில் மைக்ரோமொபிலிட்டி வகை வாகன பயன்பாட்டை சோதிக்க ஓராண்டு ஆகும் என போக்குவரத்து துணை அமைச்சர் தெரிவித்தார்.
அனைத்து சாலைப் பயனாளர்களின் பாதுகாப்பு உட்பட பல்வேறு அம்சங்களில் சோதனையில் கவனம் செலுத்தப்படும் என்று டத்தோ ஹஸ்பி ஹபிபொல்லாஹ் கூறினார்.
” மைக்ரோ மொபிலிட்டி பயன்பாடு ஷா ஆலமில் ஒரு வருடத்திற்கான சோதனை நிலையில் உள்ள வேளையில் இது இப்போது விளையாட்டு மைதானத்தில் மட்டுமே அனுமதிக்கப்படுகின்றன.
“இந்த விஷயம் இன்னும் பொது சாலைகளில் பாதுகாப்பாக பயன்படுத்துவது குறித்த விரிவான ஆய்வு தேவை. சாலை சிறியதாக இருந்தாலும், மற்ற பயனர்கள் இருக்கும் வரை, அது மைக்ரோ மொபிலிட்டி பயனர்களுக்கு இன்னும் ஆபத்தை ஏற்படுத்தும்,” என்று அவர் இன்று டேவான் ராக்யாட்டில் கம்பார் பிரதிநிதி சாங் ஜெமினின் கேள்விக்கு பதிலளித்தார்.
உள்ளூராட்சி அபிவிருத்தி அமைச்சுடன் வழிகாட்டுதல்களை வெளியிடுவதற்கு முன்னர், அதே ஆய்வு சைக்கிள் பாதைகளையும் தீர்மானிக்கும் என்று அவர் கூறினார்.
