கோலாலம்பூர், ஜூலை 17: எதிர்வரும் சனிக்கிழமை மாட்சிமை மிக்க மாமன்னர் இப்ராஹிம் அவர்களின் முடிசூட்டு விழாவை முன்னிட்டு தலைநகரைச் சுற்றியுள்ள மொத்தம் 14 சாலைகள் கட்டம் கட்டமாக மூடப்படும் என்று கோலாலம்பூர் காவல்துறைத் தலைவர் டத்தோ ருஸ்டி முகமட் இசா தெரிவித்தார்.
முக்கியப் பிரமுகர்களை அழைத்துச் செல்வதற்கும், போக்குவரத்தை கட்டுப்படுத்துவதற்கும் மற்றும் போக்குவரத்துச் சட்டங்களை அமல்படுத்துவதற்கு மூத்த மற்றும் இளைய காவல்துறை அதிகாரிகளைக் கொண்ட 387 உறுப்பினர்களை அன்றைய தினம் கோலாலம்பூர் போக்குவரத்து புலனாய்வு மற்றும் அமலாக்கத் துறை பணியில் ஈடு படுத்தும் என்றார்.
“ஜாலான் துன் ரசாக், ஜாலான் கியா பெங், ஜாலான் ராஜா சூலான், ஜாலான் அம்பாங், ஜாலான் சுல்தான் இஸ்மாயில், நெடுஞ்சாலை சுல்தான் இஸ்கண்டார், ஜாலான் துவாங்கு அப்துல் ஹலிம், ஜாலான் செமந்தன், ஜாலான் டாமன்சாரா, ஜாலான் இஸ்தானா, கோலாலம்பூர்-சிரம்பான் விரைவுச்சாலை, ஜாலான் கூச்சிங் (தெற்கு), டத்தோ ஓன் ரவுண்டபோர்ட் மற்றும் ஜாலான் நாடாளுமன்றம் ஆகியவை சம்பந்தப்பட்ட சாலைகள் ஆகும்.
“இந்த சாலைகள் முடிசூட்டு விழாவுக்காகக் காலை 8 மணிக்கும், அரச விருந்து விழாவுக்காக இரவு 8 மணிக்கும் தற்காலிகமாக மூடப்படும்” என்று அவர் அறிக்கை ஒன்றில் தெரிவித்துள்ளார்.
அரச விருந்தாளிகள் அப்பாதை வழியாக செல்லவும், குறிப்பிட்ட நேரத்திற்குள் வர அனுமதிக்கவும் அச்சாலைகள் தற்காலிகமாக மூடப்படும், பிறகு மீண்டும் திறக்கப்படும் என்றும் ருஸ்டி கூறினார்.
எனவே, போக்குவரத்து நெரிசலைத் தவிர்க்க, சம்பந்தப்பட்ட பாதையைப் பயன்படுத்த வேண்டாம் என்றும், அந்த இடத்தில் கடமையில் இருக்கும் போக்குவரத்து காவல்துறை அதிகாரிகளின் அறிவுறுத்தல்களைப் பின்பற்றுமாறும் அவர் அறிவுறுத்தினார்.
“ஏதேனும் கேள்விகள் அல்லது தகவல் உள்ளவர்கள் கோலாலம்பூர் காவல்துறையின் ஹாட்லைனை 03-2115 9999 என்ற எண்ணில் அல்லது ஜாலான் துன் எச்.எஸ் லீ போக்குவரத்து காவல் நிலையம் 03-2071 9999 அல்லது JSPT கோலாலம்பூர் ஹாட்லைன் 03-2026 0267/69 அல்லது அருகிலுள்ள எந்த காவல் நிலையத்தையும் தொடர்பு கொள்ளலாம்” என்றார்.
– பெர்னாமா
