கிள்ளான், பிப் 5: இரண்டு ஆண்டுகளுக்கு முன்பு அறிமுகப்படுத்தப்பட்டதிலிருந்து 30 முறைக்கு மேல் எஹ்சான் ரஹ்மா விற்பனைக்கு வருகை புரிந்ததாக ஓய்வு பெற்ற இராணுவ வீரர் ஒருவர் தெரிவித்தார்.
அரிசி மற்றும் முட்டை போன்ற அடிப்படைப் பொருட்களை மலிவு விலையில் வாங்குவதற்கு உறவினர்கள் அல்லது அண்டை வீட்டுக்காரர்களுக்கு எப்போதும் உதவுவதாக 68 வயதான முகமட் யூசுப் முகமட் ரெஜாப் கூறினார்.
“நீங்கள் நீண்ட வரிசையில் நிற்க வேண்டியிருந்தாலும், நீண்ட நேரம் காத்திருக்க வேண்டி இருந்தாலும் பரவாயில்லை, ஆனால் என்னைப் பொறுத்தவரை, இங்கே பொருட்களை வாங்குவது செலவை வெகுவாகக் குறைக்கிறது,” என்று அவர் கூறினார்.
இன்று பண்டார் பாரு கிள்ளான் மாநிலச் சட்டமன்ற அளவிலான மலிவு விற்பனை ஜாலான் தெப்பி சுங்கையில் நடைபெற்றது. அதில் கலந்து கொண்ட அவர் இவ்வாறு கூறினார்.
எஹ்சான் ரஹ்மா விற்பனை பொருட்களின் தரம் மிகவும் நன்றாக இருக்கிறது என முகமட் யூசுப் தெரிவித்தார். மேலும், அவர் சில சமயங்களில் வாங்கும் அரிசியை ஏழ்மை நிலையில் உள்ளவர்களுக்கு நன்கொடையாகவும் வழங்குவதாகத் தெரிவித்தார்.
சிலாங்கூர் விவசாய மேம்பாட்டுக் கழகம் நடத்தும் எஹ்சான் ரஹ்மா விற்பனை 74 வயதான கான் மெய் என்பவரின் வீட்டிற்கு அருகில் ஏற்பாடு செய்யப்பட்டுள்ளது. இந்த வாய்ப்பை அவர் வீணாக்கவில்லை.
“காலை 8 மணிக்கே வரிசை எண்ணைப் பெற வந்தேன்.
“நான் மலிவு விலையில் முட்டை, கோழி போன்ற அடிப்படை பொருட்களை வாங்கினேன்,” என்று அவர் கூறினார்.
மலிவு விற்பனை எதிர்காலத்திலும் தொடரப்படும் என்று கம்சியா காசிம் (70) நம்புகிறார், ஏனெனில் இது குடியிருப்பாளர்களுக்கு பயனளிக்கிறது.
“என்னைப் போன்ற முதியவர்களுக்கு இருக்கை வழங்குவது போன்ற வசதிகள் மூலம் சுலபமாகப் பொருட்களை வாங்க முடிகிறது,” என்று அவர் கூறினார்.