ஷா ஆலம், ஏப்ரல் 5: பண்டார் புத்ரி பூச்சோங்கில் இலவச ஆன் டிமாண்ட் டிரான்சிட் (டிஆர்டி) வேன் சேவையின் முன்னோடித் திட்டம் மார்ச் மாதத்தில் செயல்படுத்தப்பட்டது முதல் நல்ல வரவேற்பைப் பெற்றுள்ளது.
பொது போக்குவரத்து எஸ்கோ இங் ஸீ ஹான், பொதுப் போக்குவரத்தைப் பயன்படுத்துபவர்களுக்கு அதில் உள்ள சிக்கல்களைச் சமாளிப்பதற்கு மாநில அரசின் புதிய திட்டத்தைத் தொடர்ந்து நன்கு பயன்படுத்திக் கொள்ளுமாறு இங்குள்ள குடியிருப்பாளர்களை கேட்டுக்கொண்டார்.
வங்கிகள், மருத்துவமனைகள், வணிகப் பகுதிகள், சிறிய மற்றும் பெரிய பல்பொருள் அங்காடிகள், இலகு இரயில் டிரான்சிட் (எல்ஆர்டி) நிலையங்கள், மற்றும் அடுக்குமாடி குடியிருப்புகள் போன்ற பல்வேறு வசதிகளுடன் முழுமையான நகரம் என்பதால், முன்னோடித் திட்டத்திற்கு பண்டார் புத்ரி தேர்வு செய்யப்பட்டது.
“டிஆர்டி வசதிக்கான விண்ணப்பத்தை இதுவரை பலர் பதிவிறக்கம் செய்துள்ளனர், மேலும் குடியிருப்பாளர்கள் மற்றும் வணிகர்களிடமிருந்து நல்ல வரவேற்பு உள்ளது,” என்று அவர் கூறினார்.
பயனர்கள் தங்கள் பயணத்தைத் திட்டமிடுவதை எளிதாக்குவதற்கு ஸ்மார்ட் மென்பொருளுடன் பொருத்தப்பட்டிருக்கும் போக்குவரத்து சேவை மற்ற தொகுதிகளுக்கும் விரிவுபடுத்தப்படும்.
நவம்பர் 25 அன்று, டத்தோ மந்திரி புசார் சிலாங்கூர் பட்ஜெட் 2023 ஐ தாக்கல் செய்யும் போது, சிலாங்கூர் மொபிலிட்டி திட்டத்தின் கீழ் பொதுப் போக்குவரத்தை வலுப்படுத்த மாநில அரசு RM25 மில்லியனை ஒதுக்கீடு செய்துள்ளதாக அறிவித்தார்.
சிலாங்கூர் ஸ்மார்ட் பேருந்தை தொடர்ந்து செயல்படுத்த 11 உள்ளூர் அதிகாரிகளுக்கு (PBT) மொத்தம் RM22 மில்லியன் வழங்கப்பட்டது. அதே நேரத்தில் இந்த வேன் சேவையை உள்ளடக்கிய சிலாங்கூர் மொபிலிட்டி ஃபேஸ் ஒன் செயல்படுத்துவதற்கு RM3 மில்லியன் வழங்கப்பட்டது.
