மிரி, ஆகஸ்ட் 1- சீனாவின் லாங் மார்ச் 5பி ராக்கெட்டின் ஒரு பகுதி என நம்பப்படும் உலோகக் சிதைவுகள் அவரது வீட்டின் அருகே இருப்பது குறித்து, இங்கிருந்து தெற்கே சுமார் 81 கிமீ தொலைவில் உள்ள செபுபோக், பத்து நியாவில் வசிப்பவரிடமிருந்து புகாரைப் பெற்றதை மிரி போலீசார் இன்று உறுதிப்படுத்தினர்.
நேற்று மாலை 5.30 மணியளவில் கிடைத்த தகவலின் பேரில், பூமிக்குள் சுமார் ஒரு மீட்டர் உலோகத் துண்டு புதைந்து கிடப்பதைக் கண்டுபிடித்ததாக மிரி காவல்துறைத் தலைவர் ஏசிபி அலெக்சன் நாகா சாபு தெரிவித்தார்.
இருப்பினும், உலோகத்தின் தோற்றத்தை காவல்துறையால் உறுதிப்படுத்த முடியவில்லை, மேலும் அந்த இடத்தை ஆய்வு செய்ய தீயணைப்பு மற்றும் மீட்புத் துறை HAZMAT மற்றும் அறிவியல், தொழில்நுட்பம் மற்றும் கண்டுபிடிப்பு அமைச்சகத்தின் (MOSTI) உதவியை நாடியது.
“உடல் ஆரோக்கியத்திற்கு தீங்கு விளைவிக்கும் கதிரியக்க பொருட்கள் இருக்கலாம் என்ற அச்சத்தில், அப்பகுதிக்கு அருகில் செல்ல வேண்டாம் என்று பொதுமக்களுக்கு நாங்கள் அறிவுறுத்துகிறோம்,” என்று அவர் இன்று இங்கு ஒரு அறிக்கையில் தெரிவித்தார்.
அசம்பாவிதம் ஏதும் நிகழாமல் இருக்க அப்பகுதியில் தீவிர கண்காணிப்பு மேற்கொள்ளப்பட்டு வருகிறது.
இது தொடர்பாக எந்தவிதமான ஊகங்களையும், போலியான செய்திகளையும் பரப்ப வேண்டாம் என்றும் மக்களுக்கு அறிவுறுத்தப்பட்டுள்ளது.
சம்பவத்தை நேரில் பார்த்தவர்கள் அருகில் உள்ள காவல் நிலையத்தை தொடர்பு கொண்டு கூடுதல் தகவல்களை அளிக்க வேண்டும்.
