ஈப்போ, மே 12 – இன்று அதிகாலை கோலா கங்சார் அருகே வடக்கு-தெற்கு விரைவுச் சாலையின் KM246 வடக்கு நோக்கிச் செல்லும் இரண்டு டிரெய்லர்கள் மீது மோதியதில் அவர்கள் பயணித்த கார் தீப்பிடித்து எரிந்ததில் 5 பேர் உடல் கருகி உயிரிழந்தனர்.
பேராக் தீயணைப்பு மற்றும் மீட்புத் துறை செய்தித் தொடர்பாளர் கூறுகையில், நள்ளிரவு 12.52 மணியளவில் இந்த சம்பவம் குறித்து தங்களுக்கு ஒரு பேரிடர் அழைப்பு வந்தது.
“அழைப்பைப் பெற்றவுடன், நாங்கள் உடனடியாக கோலா கங்சார் தீயணைப்பு மற்றும் மீட்பு நிலையத்திலிருந்து (BBP) பணியாளர்களையும் அதிகாரிகளையும் அனுப்பினோம், மேலும் மேரு ராயா பிபிபி, காமுந்திங் பிபிபி மற்றும் ஈப்போ பிபிபி ஆகியவற்றின் உதவியைப் பெற்றோம்,” என்று அவர் இன்று ஒரு அறிக்கையில் கூறினார்.
அவரது கூற்றுப்படி, இதுவரை அடையாளம் காணப்படாத ஐந்து பேர், ஒரு காரில் பயணித்துக் கொண்டிருந்தபோது, இரும்பு கம்பிகள் ஏற்றப்பட்ட 20 டன் எடையுள்ள வால்வோ டிரெய்லர் மற்றும் மொசைக் டைல்ஸ் ஏற்றிச் சென்ற இதுபோன்ற மற்றொரு டிரெய்லர் மீது மோதி விபத்துக்குள்ளானது.
கார் மற்றும் முதல் டிரெய்லர் இரண்டும் 90 விழுக்காடு எரிந்தது ஆனால் மற்றொரு டிரெய்லர் தீ பிடிக்கவில்லை.
இரண்டு டிரெய்லர்களில் இருந்த மூவரும் காயமின்றி தப்பிய நிலையில், பாதிக்கப்பட்ட காரிலிருந்த ஐந்து பேரும் இறந்துவிட்டதாக மருத்துவ அதிகாரி உறுதிப்படுத்தினார்.
பலியான 5 பேரின் உடல்களும் பிரேத பரிசோதனைக்காக கோலா கங்சார் மருத்துவமனைக்கு அனுப்பி வைக்கப்பட்டதாக அவர் மேலும் கூறினார்.
