ஷா ஆலம், ஜூலை 4– கடுமையாக்கப்பட்ட நடமாட்டக் கட்டுப்பாட்டு ஆணை (பி.கே.பி.டி.) அமல்படுத்தப்பட்டிருக்கும் பிஜேஎஸ் 8, மெந்தாரி கோர்ட் குடியிருப்பைச் சேர்ந்த 9,000 குடியிருப்பாளர்கள் நாளை தொடங்கி தடுப்பூசியைப் பெறுவர்.
அக்குடியிருப்பாளர்களிடம் மேற்கொள்ளப்படும் கோவிட்-19 பரிசோதனை இன்றுடன் முடிவடைந்த பின்னர் நோய்த் தொற்றிலிருந்து விடுபட்டவர்களுக்கு நாளை முதல் தடுப்பூசி செலுத்தப்படும் என்று பெட்டாலிங் மாவட்ட அதிகாரி டத்தோ ஜொஹாரி அனுவார் கூறினார்.
இப்பகுதியில் மக்கள் தொகை அதிகமாக உள்ளதால் அனைவருக்கும் கோவிட்-19 பரிசோதனை மேற்கொள்ளப்படவில்லை. அதே சமயம் நோய்த் தொற்று இல்லாதவர்கள் மட்டுமே அடையாளம் காணப்பட்டு தடுப்பூசி செலுத்தப்படுகிறது என்றார் அவர்.
இதுவரை ஏ மற்றும் பி புளோக்கை சேர்ந்த 2,700 பேருக்கு கோவிட்-19 பரிசோதனை மேற்கொள்ளப்பட்டுள்ளதாக அவர் குறிப்பிட்டார்.
மெந்தாரி கோர்ட் குடியிருப்பில் 500 கோவிட்-19 சம்பவங்கள் அடையாளம் காணப்பட்டதை தொடர்ந்து அங்கு கடுமையாக்கப்பட்ட நடமாட்டக் கட்டுப்பாட்டு ஆணை பிறப்பிக்கப்பட்டது. தடுப்பூசி இயக்கம் மேற்கொள்ளப்படும் முதலாவது பி.கே.பி.டி. பகுதி மெந்தாரி கோர்ட் குடியிருப்பாகும்
